هذا في يوم من الايام حكى معي واحد اسمه ابو راضي
وابو راضي هذا كان يشتغل شفير عند وزير غني كثير
قاللي اسمع بدي اياك تنظفلنا هالبويلر وبعطيك عليه عشرين ليره
- ولمن لا يعرف البويلر فهو جهاز لتسخين الميه وبطلع شحبار اسود زي الزفت -
قلت بعقلي انت جيت ولا الهوا رماك والله ما في بجيبتي ولا ترن
قلت بس خليني اثقل شوي فقلتله خليني افكر شوي
قالي ولك انت فيك عقل تفكر قوم فز بسرعه احسن ما اجيب واحد ثاني
قلتله طيب طيب خليني اجيب العده ونطلع المهم طلعنا من واد الحداده على عبدون
ودخلني على هالبيت هو بيت؟ قصر
انا انشوحوا عيوني من اولها..... مليان شجر ومليان نسوان ومليان اصنام
بقوله ولك يا ابو راضي كنه ما في زلام بالبيت كله نسوان؟
قالي يا هبيله هذول الخدامات لسه اهل البيت ما صحيوا من النوم
قلتله ولك الساعه 12 ولسه ما صحيوا؟؟ انا امي بتكون مخلصه طبيخ الساعه 8 الصبح
طيب وليش كل هالاصنام احنا جايين على دار ابو جهل؟
قاللي هذول تماثيل بعدين اتكثرش برم والتهي بشغلك
المهم انا انبلشت بالبويلر ونظفته وخليته يوج وج بس انا اكلت روح الوحله من الشحبار
صرت كلي اسود من ساسي لراسي ومشحبر وحالتي بتصعب عالكافر
اجا ابو راضي واول ما شافني فقع من الضحك قلتله خير مالك بتطلع وبتضحك شو ناسي بوجهي بريزه
قالي ولك هو انت ضللك وجه مهو وجهك وقفاك واحد قاللي اسمع وقف هون احسن ما توسخ
الدنيا وتلعن ابونا على عزا امنا وننطر (ننطرد) من ورا ضهرك اسحك تتحرك من مكانك فاهم؟
قلتله حاضر ..والله انا ضليت واقف زي الصنم مهو البيت مليان اصنام ولا هو جاي على واحد
شكله زي السيرالنكيين قلت بعقلي خليني اطلب منه كاسه مي لانه ثمي وزوري مليانين شحبار
فقلتله انت انت ...ابو شباب... ممكن جيب واهد كاسه ميه (يا عيني عاللغه السيرالنكيه)
اتطلع علي باحتقار من فوق لتحت وقاللي ولك انت شو اللي جابك هون
ابن الحرام بحكي عربي احسن مني قلتله والله ما ضل عالخم الا ممعوط الذنب
ما ضل غيرك يحكي يا مصدي ولك انا شايف زيك كراتين روح انقلع جيبلي كاسه مي
الزلمه وجهه اسود بس انا حسيت انه الدم بده يطلع من وجهه من كثر الغضب
قاللي شو بتحكي يا كلب يا حيوان ولك انت عارف حالك بتحكي مع مين
قلتله بطلعلك يا معفن مهو كلب الشيخ شيخ المهم وانا احكي معاه ولا هي جاي هالبنت
الحلوه لابسه اللي عالحبل اجت بسرعه عليه وقلتله بابيييييييييي وباسته
انا الفار بلش يلعب بعبي شكله في اشي غلط قالتله مالك معصب بابي
قالها هدا الحقير بده اياني اجيبله كاسه مي ....البنت شهقت شهقه حسيتها بدها تموت
الفار بلش يلعب اكثر بعبي..... معلش يا بابي هدول الناس اللي بئرفوا ما لازم تحكي معهم
خلي ابو رادي يئلعوا من هون قالت البنت
ايه ايه ايه شو اللي صار شو اللي انا خبصته ومين بابي هذا ولك انتي بيضه وهذا سيرالنكي كيف صار ابوكي بعدين انا بئرف يا بنت ال..........؟؟ وانا مزبهل من اللي صار ولا ابو راضي شرف
ومن ساعه ما اجا زي اللي تكهرب وقال صباح الخير سيدي معلش سيدي هدا المواسرجي جبناه عشان ينظف البويلر سيدي
قلت بعقلي مين سيدي هذا؟ وليش ابو راضي بهزله ذنب ؟انا صرت اضحك على ابو راضي وطبعا وجهي اسود بشبه كونتا كونتي تبع فيلم الجذور ومش مبين غير سناني ورحت قلتله ولك يا ابو
راضي هسا هذا السيرالنكي سيدك ؟ شو صار بعقلك يا زلمه
قاللي ولك اخرس يا حيوان هدا سياده الوزير
انا قلت ااااااااااااااااااااااااااه اجاك الموت يا تارك الصلاه اكلنا ..ره ورجعنا لورا
ولا هو هذا الوزير صار يصرخ ويقول ارمولي اياه بره ما بدي اشوف خلقته هون
والبنت بتقول الله يئرفك شو بتئرف بره بره يللا بره
المهم هجموا علي الخدامين والخدامات وابو راضي معهم وبكسات وشلاليت ورموني بره
وانا اصرخ فيهم طيب اعطوني العشرين ليره يا نصابين ولكم معيش اروح عالدار لكن لا حياه لمن تنادي
طيب هسا كيف بدي اروح على واد الحداده كلي شحبار واسود وما حد برضى يطلعني معه صرت ا
امشي وطول الطريق وانا ابكي ودموعي تنزل سوده مع الشحبار واقول طيب هذول عايشين واحنا عايشين؟ بشو هم احسن منا؟ ليش بحتقرونا؟ وطول الطريق وكل واحد يشوفني يضحك علي
طبعا معاه حق هو انا منظري منظر ؟ المهم وصلت عالبيت مقهور وتعبان وهلكان ومنصوب علي
والعده راحت اخذوها الكلاب نفسي افهم ليش اخذولي العده.. طبعا مهمو متعودين عالاخد ومش
مستعدين يعطوا ولما شافت امي منظري كلي شحبار ومضروب وحالتي حاله قالتلي مالك يا مشحر
شو اللي جرالك شو صار معك؟ قلتلها القصه وصارت تدعي عليهم وعلى اللي جابوهم المهم
الحجه الله يخليلنا اياها سخنتلي ميه عشان اتحمم وحضرتلي اكل وجطيت راسي ونمت زي القتيل
كنت متعود كل فتره اروح على محل انترنت اتفرج على اصحابي وهم يلعبوا عالكمبيوتر وفي واحد
من اصحابي هذول ابن حرام بالكمبيوتر رحت قعدت عنده وقلتله شو صار معي قاللي بسيطه يا زلمه علقه تفوت ولا حد يموت بس اسمع انا راح اطلعك من كل هالجو شو رايك ازبطلك بنت وتصير تحكيو تطلع معها بس بشرط انك ترد على اللي بقولك اياه
انا بصراحه ريالتي نزلت قلتله انا من ايدك هاي لايدك هاي بس كيف ؟
قاللي في واحده صارلي فتره بحكي معها هون وما بعرفها وانت وحظك تطلع حلوه او بشعه ما بعرف بس شكلها هاي هاي وانا زهقان النسوان فراح اعطيك موبايلي لاني اشتريت واحد جديد وفيه الرقم راح اعطيها اياه لانها مستقتله تحكي معي وانا ثقلان بس بتحكيها انك دارس دكتور باليابان
فاهم ؟ لازم باليابان لانك حمار بالانجليزي
قلتله دكتور دكتور اصلا انا ازعم دكتور ما بفهم قدي حتى راح اقولها اني متخصص بالمسالك البوليه
لانها شغلتنا
قاللي والله جبتها خلص بوعدك كمان ساعه راح تحكي معك وبدي اياك تحكي معها من فوق فاهم؟
قلتله ماشي وفعلا بعد ساعه ولا هو برن التلفون وصوت نسائي ناعم بقوللي هاااااااااي
كيفك مشتائه اسمع صوتك ولازم اشوفك اليوم مش بكره
انا ضربت لخمه بطلت اعرف شو بدي احكي قلتلها اسمعي انا مش فاضيلك اليوم عندي موعد بالمستشفى في عمليه تسليك قصدي فحص لواحد المسالك عنده مسكره
قالتلي بس انا حابه اشوفك اليوم مش ئادره استنى لبكره اذا بتحب بجيلك وين ما بدك
قلتها طيب بشوفك بس وين بدي اشوفك قالتلي اذا بتحب بشوفك عند سينما جاليريا
قلتلها لأ اذا بدك بشوفك عند سينما غرناطه بعدين هذول 5 افلام وعرض متواصل يعني بنضل للصبح
قالتلي موافقه وين ما بدك بشوفك ومش عارفه ليش حاسه حالي بحبك بدون ما اشوفك
قلتلها بلاش عرط قصدي بلاش نحكي عالحب هسا الا لما اشوفك لاني مشغول كثير والناس
بستنوا فيي يللا مع لسلامه وسكرت الخط بوجهها وانا ايدي بترج من الصدمه مش مصدق حالي
انه في واحده حكت معي وشوي ولا هو صاحبي جاي قاللي شو صار معك قلتله كل اشي قاللي الله لا يوفقك ولك على غرناطه بدك توخدها شو بتفكرها ابو العبد الحلاق؟ اسمع اعطيني موبايلي
خليني اصلح الوضع المهم اخذ التلفون وبعتلها مسج وقالها بشوفك عند المكدونالدز اللي بالصويفيه وقالها انا لابس كذا وكذا
وقاللي انت تعال معي راح لبسني بلوزه ملهاش كمام وبنطلون جينز مزع وعبالي شعري جل وتطلع فيي وقاللي علي الطلاق انك احلى من سيلفستر ستالوني قلتله مين سيلفستر سويلم هذا؟ قاللي بعدين بتعرفه
واخدني بسيارته ال190 ورحنا هناك عالموعد ودخلني عالمحل وانا قلبي بدق ووجهي احمر
وميت من الخوف المهم تطلعت بالمحل هيك ولا هو كله بنات وولاد اواعيهم ممزعه مثلي
قلت شو هذا؟كانه مركز تجمع الشحادين الدولي فكرت حالي غلطت بالعنوان وجيت بدي اطلع
ولا واحده بتصرخ من جوه...توووووووتي توووووتي
ولا هي جاي ركاض عليي ولابسه لبس غير شكل وبالاحضان يا معلم
انا فكرتها بدها تضربني دفشتها لورا وجيت بدي اضربها بوكس على عينها ولا ايدي وقفت
ولك هاي انا بعرفها هاي بنت الوزير وجاي كمان بدك تكملي علي انا ما صدقت خلصت منك ومن ابوكي
وللقصه بقيه .....
مغامرات مواسرجي (ج3) في الماكدونالز ...
